Saitual District tihpuitlin ngiatin Saitualah kawng zawh

Saitual District a taka tihpuitlin ngiatin nimin khan Saitual leh a chhehvel khuate’n Saitualah kawng an zawh a, Aizawl-ah pawh Saitual-in a huam khaw hrang hrang mi leh sa Aizawla awmte pawh he thil an thlawpzia lantir nan an pungkhawm a ni.

Saitual mipui te hian Saitual PWD kawn leh Keifang dawrkawn aṭangin kawng an zawh ṭan a, PWD Kawn aṭang hian Saitual VC Area pathum – Sihfa leh hmar lama khaw pathum mipuite’n kawngzawh an ṭan a, Keifang Dawrkawn aṭangin Keifang, Rulchawm, Raulluang leh khaw hnaivai mipuiin kawngzawh an ṭan bawk a, Saitual Civil SDO Kawn-ah Kawngzawh kharna hun hman a ni a, Kawngzawhtute hian resolution pass-in, September ni 12, 2008-a Mizoram sawrkarin Saitual District a lo puan tawh chu Bialtu MLA, Home Minister Pu R. Lalzir-liana’n sawrkar term chhung ngeia tihpuitlin a tiam nia sawiin, tun thla ni 12 ral hma ngeia tipuitling turin sawrkar an phut tih an sawi a, Saitual District a taka tipuitling tura Chief Minister Pu Lal Thanhawla hnena nikum June ni 16-a memorandum an lo thehluh tawh chu Saituala pawl hrang hrang – YMA, MHIP. MUP, MZP, MSU, Political party zawng zawng leh Village Council zawng zawngin an thlawp thu an tarlang a ni.

Kawngzawh a nih avang hian niminah Saitual-ah mimal lirthei veivak hmuh tur a awm lova, zirna in leh sawrkar office-te pawh khar vek a ni.

Saitual mipuiin nimina kawng an zawh hi an thlawpzia tihlan nan nimin zingkar khan Saitual Town Youth Organi-sation leh Saitual khawpuiin a huam khaw hrang hrang – Sihfa, Ruallung, Rulchawm, Keifang leh Saitual Welfare Aizawla awmte chu Aizawl Zodin Square, Mahatma Gandhi lim bulah pungkhawm-in, Saitual District tihpuitlin ngiatna thuziak kengin an au rual a, ‘Saitual District hi tihpui-tlin ni rawh se’ tih te, ‘Mizoram Sawrkar hi a thutiamah ding rawh se’ tih leh ‘Saitual District tihlawhtling theitu Sawrkar kan duh’ ti tein he huna kalkhawmte hi an aurual a ni.

He hun hi STYO President leh Saitual Welfare Committee, Aizawl Chairman ni bawk Pu VL Krosshnehzova chuan a kaihruai a, kum 2008 daih tawha Mizoram Sawrkarin District-a a puan, 2008 leh 2013 inthlanpui dawna rorellai party aiawh a an candidate in tihhlawhtlin a tiam tawh mai piah lama, AICC Vice President, khatih laia an General Secretary Rahul Gandhia’n ‘The still-born district headquarter, announced by the MNF Govt. shall be made fully function by the Congress Govt.’ tia kum 2008 MLA inthlan dawn a, Saitual Playground-a a lo tiam tawh a nih thu sawiin, an tiam anga tihhlawhtlin ngiata Saitual District Implementing Demand Committee (SDIDC) te hmalakna an thlawpzia tilang tur leh Saitual Town mipuiin kawng an zawh thlawp tlat a ni tih tilang tura pungkhawmna hi buatsaih an nih thu a sawi a.

Saitual District hi kum 1970 bawr chho vel aṭanga khawtlang hruaituten zawl dawh tak leh tharum tellova an nawr chhunzawm reng thu leh, an beisei reng a nih thu sawiin, tunhnaia midangin an nawr avanga nawr thar ve thut an nih loh thu leh, pawi khawih lova an chetna chuan Mizoram Sawrkar ngeng a chhun phalo a nih rinna thui tak an neih thu te, duh aia thui kal ngai lova, a intiamna anga sawrkar chu a chet mai beisei a nih thu a sawi bawk.

About Editor

C.Lalrochhuanga, New Serchhip, Serchhip - 796181 Mizoram Contact: 8974286711

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.