CM hovin MHIP Day hmang

Ningani khan Chief Minister Pu Lal Thanhawla chuan Mizoram Hmeichhe Insuih-khawm Pawl (MHIP), Serchhip Town Area Committee-ten P&E Veng YMA Hall-a MHIP Day vawi 43-na lawmna an buatsaih chu khuallian niin a hmanpui a, he hunah hian Chief Miniser hi a nupui Pi Lalriliani, MHIP Gen. Hqrs. Patron chuan a ṭawiawm a ni.

Chief Minister Pu Lal Thanhawla chuan tun hmaa MHIP inthlan dan kha MLA inthlan te aiin a bawn zawk em aw? tia a ngaihtuah ṭhin thu a sawi a, tuna an inthlan hnuhnung ber erawh tun hma zawng aiin a thianghlim zawk nia a hriat thu a sawi a, engkim kan tihah hian ringtu kan nihna hi lang hmasa ber zel se a duh thu a sawi.

Pu Lal Thanhawla chuan India rama hmeichhiate din-hmun chawikawnna kawngah Mizoram chu a tiṭha pawl a nih thu sawiin hmeichhia te tana dan kan neih The Mizoram Marriage, Divorce & Inheritance Act hi dan tha tak a ni a, hmeichhia te dinhmun a that loh chuan khawtlang (society) tha kan nei thei lova, he dan hi kan that tlanna tur a ni, a ti.

Chief Minister chuan Khawvel inkaihhruaina kalphungah nute hi an pawimawh ber a, khawtlang nun siamṭha a, kohhran tichaktu tur chu nu te an ni a, kawng hrang hrangah nute dinhmun a pawimawh a, an mawhphurhna hlen chhuak turin MHIP member kalkhawmte chu a fuih a ni.

He huna khualzahawm District Bawrhsap, Pi Sang-chhin Chinzah pawhin thu sawiin, Mizo hmeichhia te an changkang tawh tih a sawi a, kan rama sualna lo tam chhan chu nuten an mawhphurhna an hlen loh vang nia a hriat thu sawiin, fate bula hun hman tam a, faten sual kawng an zawh lohna tura nuten ṭan an lak vek chuan Society ṭha tak kan nei ang, a ti bawk.

MHIP Day lawmna prog-ramme hi STAC President Pi Sanghmingliani’n kaihruaiin, Father. Gabriel Laltlanthanga, Parish Priest, Catholic Church, Serchhip in hunserh a hmang a, MHIP Gen. Hqrs. President Pi Saipuii te pawhin thu an sawi a ni.

Serchhip Town Area Committee-ah hian Serchhip town chhunga MHIP Branch 16 awm aṭangin Branch 15 an tel a ni.

About Editor

C.Lalrochhuanga, New Serchhip, Serchhip - 796181 Mizoram Contact: 8974286711

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.