IPS Probationer-ten Mizoram Chief Minister an kâwm

Nimin khan Chief Minister Pu Lal Thanhawla chu a Office-ah Sardar Vallabhai Patel National Police Academy-a training mek mi 16 leh an Faculty Co-ordinator ten an hmu.

Cief Minister chuan hun lo awm zel turah IPS training mek te chu an ko-ah mawh-phurna sang tak tak a tla dawn tiin, chung ah te chuan ram leh mipui tan hleih nei lova, mi hausa leh mirethei thliar lova mipui rawngbawl sak turin a chah a, an kal zelna turah duhsakna a hlan a ni.

Chief Minister chuan Mizoram leh Mizote chanchin tlangpui hrilhin kum 20 chhunga rambuai in Mizoram kawng hrang hrang a nghawng dan te, remna leh muanna atana hma leh tan sawrkar, pawl leh Kohhran anga lak a nih dante chhipchhiar takin a sawi a. India rama inenhranna awm thin chu amah ngei pawhin a lo tawn dante hrilhin India mipui nawlpui hian he ram ropui tak hi mihring chi thum – Aryans, Dravidians leh Mongloids te chenna a ni tih leh heng te hi inangkhatin ram neitu kan ni tih hi pawm a tul nia a hriat thu te a sawi a. An hnathawh naah te heng thu te hi hria a, hlei nei lova, enhranna tel lovin mipui rawngbawl hna thawk thin turin a chah a. India ramah cheng khua leh tui tha leh a bik takin sawrkar hnathawk leh mipui rawngbawl hna thawkte tan ram kilkhawr ber chanchin te pawh hriat a tul tih sawiin ram leh a chengte chanchin tlangpui kan hriat hian kan hna hi tha zawk leh sawt zawkin kan thawk thei a ni tih chu hre reng turin a fuih a. Mizoram-in kawng hrang hranga hma a sawn dan te, hmachhawp a neih te leh hmasawnna atana thil pawimawh nia a hriat te pawh a hrilh a. Police officer rinawm, dik leh tha nia an thawhna tur state ah theuh midangte tan kawng engkima entawntlak ni turin a fuih a, an kal zelna turah duhsakna a hlan bawk a ni.

Probationary officer 16 zingah hian IPS 2015 Batch mipa 11 leh hmeichhia 2 an tel a anni bakah hian Royal Bhutan Police officer trainee 2 leh Maldives Police officer trainee 1 a tel bawk a ni.

About Editor

C.Lalrochhuanga, New Serchhip, Serchhip - 796181 Mizoram Contact: 8974286711

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.