Serchhip-ah hmun thumnah Remna Ni lawmna hun hmang

India sawrkar leh MNF party-in kum 1986-a inremna an ziah ni champha vawi 31-na ‘Remna Ni’ chu nimin khan Mizoram chhung hmun hrang hrangah hman a ni a, Serchhip-ah pawh MNF leh Congress party-ten a hrang ve ve-a an hman bakah Mizo Zaimi Insuihkhawm (MZI) chuan he ni lawmna hi an hmang bawk a ni.

Serchhip MNF East Block chuan nimin khan Pu K.Tlang-thanmawia In, Serchhip Bazar vengah Remna Ni lawmna hi an nei a, he hun rawn hmanpuitu Minister hlui Pu Saikapṭhianga chuan Remna lawm tur neia kan awm hi a lawmawm a, MNF leh India sawrkarten inremna thuthlung ṭha tak an neih avangin Mizote hian a hlawkna kan la tel chho zel dawn a, BJP sawrkar emaw sawrkar laipui emaw pawhin bawng talhte pawh lo khap mahse kan inremna thuthlung-in a ken tel, Mizoram sawrkarin a remtih loh phawt chuan khap ngawt theih a ni lo a ti.

Pu Saikapṭhianga chuan remna hi Mizote ta a ni a, tu ten emaw Mizote tlawmna ni anga an sawi ṭhin hi a dik lova, zalenna suala hlawhchham anga sawi te hi Mizote ka aṭanga chhuaka mawi lo a ni a, kha zalenna sual leh inremna hian rah ṭha a chhuahin Mizote min humhim a ni a ti.

Pu Saikapṭhianga chuan remna leh muanna kan neih theih nana lal ṭhutthleng ken chungchangah Pu Lal Thanhawla chauh sawi bing a ni ṭhin chu tuten emaw an intlawnsiak a, intihlawm tumna mai mai a ni a ti a, lalṭhutthleng kian sawi dawn chuan, Pu Liansuama, Pu Hiphei leh Pu Rokamlova te pawh sawi bân chi an ni lo a, VIP car nena office kal kha an  haw lamah chuan an private car-in an haw a, Pu Hawla chu CM Car aṭangin Deputy CM car-in a la haw thei tal a ni a ti bawk.

Serchhip Block Congress Committee huaihawtin New Serchhip YMA hall-ah Remna Ni hmanaah chuan thusawitu Block Congress President Pu PC Vanlalsawma chuan remna hi tu ten emaw a binga malsawmna an dawn pumhlum loh avanga hlu lo a ni lo tiin, rambuai vang khan Mizo nunphung a chhe nasa a, dikna a bo a, inringhlel reng rengin ralṭi takin kan awm a, khatihlaia Chief Minister Pu Lal Than-hawla’n minute khat pawh ka inngaihtuah lovang a tih ang ngeia a lalṭhutthleng a ken vangin remna hi a awm a ni a ti a. Khami hun hma lama PC party chak chhan pawh Mizo mipuiin remna thlentu a nih an beisei vang a ni a, mahse beisei loh angin buaina a punlun zawk a, remna siam turin Congress a lo ding chhuak leh ta a, Politics hi thianghlim taka kalpuiin Pathian rawngbawlna rilrua kalpui theih a ni a ti a,  Serchhipa hmasawnna hrang hrang a tarlang bawk.

He hun, Pu R.Vanlaldula, Vice President kaihhruaiah hian PAMRA Saizahawla District Hqrs. Serchhip President Pu PC Lianhnuna pawhin sawm an nih angin thu a sawi a. Peace accord ken tel tura dah, hamṭhatna an la dawn loh zirchianga ennawn tur Committee CM ho meuhva din thar avanga an lawmthu sawiin, Mizo hnam hmelma chu hnam dang leh ram dang mi an ni lova, kan ram kan hnam tichhe-tu apiang hi an ni mai a ti.

He hunah hian Serchhipa VCP leh an aiawh mi 5 – Pu Lal-rinthanga Sailo, Pu Roluah-puia, Pu PC Siamliana, Pu H.Sai-chhinga leh Pu John Lalhma-ngaiha te pawhin thu an sawi.

MZI Sub-Hqrs., Serchhip pawhin nimin chawhnu lam khan P&E Rest House, Bukpuiah he ni hi intihhlimna nen an hmang a, he hun hi MJA, Serchhip District Member te pawhin an hmanpui a ni.

About Editor

C.Lalrochhuanga, New Serchhip, Serchhip - 796181 Mizoram Contact: 8974286711

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.