SHG te enkawl tur Village Level Federation Office Building Leng-ah hawng

Ningani khan Leng khuaa Self Help Group hrang hrang intelkhawmte enkawlzui tura sak, Village Level Federation Office building thar chu Pi H. Lalchhandami, Chief Executive Officer (CEO) Mizoram State Rural Livelihood Mission (MzSRLM) chuan a hawng.

He building hawngtu Pi H.Lalchhandami MCS, CEO, MzSRLM chuan Leng khua hi Mizoram puma mahni pual liau liau a Village Organisation Building nei hmasa ber an nih thu sawiin, “He Mission hi hmun tam takah nu hovin an hman ṭangkai hle a, mahni maia hmalak dan kawng hre lo te pawh he mission avanga ding chhuak mek hi hmun tam takah an awm tawh a ni,” a ti. CEO chuan sawrkar hmalakna hrang hrang te hlawk zawk leh awmze nei zawka kalpui a nih theih nan insuihfin a pawimawh thu sawiin, Convergence uar zual zel turin E.Lungdar Block chhunga thuneitute a ngen bawk a ni.

Hei bakah hian CEO chuan SRLM hnuaia hmalakna thar buaipui mek te sawiin, MKSP hnuaiah hmeichhe loneitute chawikanna tura hmalak mek a nih thu leh DDUGKY hnuaiah ṭhalaite tan skill development training nei tura ruahmmanna siam mek anih thu a tarlang bawk.

He building thar hawn tak hi BADP sum, Cheng nuai 7 hmanga sak a niin, a dung 30ft leh a vang 18ft a ni a. Hei bakah hian building pawnah inthiarna 8ft x 5ft  siam a ni bawk.

Leng khua hi E. Lungdar RD Block chhunga awm niin, Chenna In 181 a awm a,  mihring 839 (mipa 396  leh hmeichhia 443) chengin, Self Help Group 16 a awm a, heng group hrang hrangah hian member mi 109 an awm a ni.

Building thar hawnna inkhawm Saihnuna Hall-a neih hi Pi Hmangaihtluangi, President Leng Village Organisation chuan a kaihhruai a, Leng Village Organisation hnathawh leh hmalakna hrang hrangte ngaihthlak niin, Pu H.Vanlal-finga Village Council President chuan inlawmna thu a sawi bawk.

Pu Vanlalṭanpuia, BDO E.Lungdar leh thawktu ṭhahnem takin he hun hi an hmanpui a ni.

About Editor

C.Lalrochhuanga, New Serchhip, Serchhip - 796181 Mizoram Contact: 8974286711

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.