Apple-in a hla an hman man Taylor Swift an pe dawn

Apple Music chuan Taylor Swift vangin an payment policy an tidanglam a, a chhan chu Swift hian a album 1989 chu pawisa chawi lova Apple Company tana hman a phal loh vang a ni.
Apple hian June ni 30 hian Apple Music streaming service an kalpui dawn a, hemi atan hian thla 3 chhung enchhinna an neihah an subscriber te tana hla ngaihthlak tur an chhawp chhuahah Taylor Swift hla hi a tel a, Taylor Swift chuan an thlawna hetianga mi ngaihthlak tura a hla chhawp chhuah hi a phal loh thu a sawi a, Apple hnenah Open Letter a thawn a, hei vang hian Apple chuan trial period chhunga hla an hmansak man hi Taylor Swift hnena an pek tur thu an sawi ta a ni.

Taylor Swift chuan, “Company ropui leh hlawhtlingin hetianga thil an ti ka hmu hian min barakhaih hle a, min tilawm lo bawk,” tiin a sawi a, “A man pe lo chuan thla 3 chhung chu rei tak a ni, mi hna thawh hah sa engmah ti lova chhanlêt hi a fair lo a ni,” tia sawiin, “iPhone pawh a thlawnin kan dil ngai lo. Khawngaih takin kan music hi man chawi lova pe tur chuan min dil bik suh u,” tiin a sawi.

Hetiang hi a nih avangin Apple chuan trial period-a Taylor Swift hla an hman man hi an pe dawn a, he album 1989 hi nikum chhunga album hralh tam ber niin, US-ah pawh maktaduai 4.9 lai an hralh a ni.

About Editor

C.Lalrochhuanga, New Serchhip, Serchhip - 796181 Mizoram Contact: 8974286711