Chhanchhuah hna thawh nan cheng vbc 35 pe chhuak

Jammu & Kashmir chu ruahsur nasain a tihbuai avangin chhanchhuah hna thawh nan cheng vbc 35 pekchhuah a nih thu an state Chief Minister Mufti Mohammad Sayeed chuan nimin khan a puang a, Kashmir Division tan cheng vbc 25 leh Jammu Division tan cheng vbc 10 dah a ni a, he thu hi Pu Sayeed-a chuan nimina an state assembly ah a puang a ni.
Ni tamtak ruah a sur tawh avang hian Jhelum lui chuan len lam a la pan chho zel a, Jammu & Kashmir sawrkar chuan Jammu phairuamah tui a len mai hlauhthawnna a awm thu puangin mipuite inralring turin a chah.

State Chief Engineer Irrigation and Flood Control in a sawi danin nimin zing dar 7 khan Jhelum lui hian Ram Munshibagh ah feet 18 leh Sangam ah feet 22 in hlauhawm chhinchhiahna a luan pel tawh a, helai hmuna chengte chu hmun him lama inthiarfihlim tura hriattir an ni tawh a ni.

Budgam biala Chadoora hmunah chuan tuilian in in 2 a chim pil a,mi 16 an tang ni a hriat a ni a, sipai leh police ten mi tangkhang te lachhuak turin ngawrh takin an thawk mek a, National Disaster Response Force team 4 lai a tul huna che thei turin an in ralring reng bawk a, state sawrkar chuan tuilian avang hian state chhunga zirna in te vawiin leh naktuk a khar turin thuchhuak a siam tawh a, University leh Board exam kallai te pawh a hun sawn an ni.

Prime Minister Narendra Modi a chuan nimin khan Kashmir a tuilian dinhmun hi thuneitu te a sawipui a, thil thlen dan a hmuna en thlithlai turin Minister of State for Minority Affairs, Mukhtar Abbas Naqvi leh official engemawzat Kashmir ah hian an tir nghal a, Home Minister Rajnath Singha pawhin Chief Minister Mufti Mohammed Sayeed a hnenah Central sawrkarin chhawmdawlna awm thei ang apiang a pek tur thu a hrilh a ni.

About Editor

C.Lalrochhuanga, New Serchhip, Serchhip - 796181 Mizoram Contact: 8974286711