Sawrkarin School Provicialise a tum tawh lo:CM

Chief Minister Pu Lal Thanhawla chuan nimina Tlungvel khawtlangina an din, Tlungvel Higher Secondary School building sak thar a hawnnaah sawrkarin school provincialise a tum tawhlo tih a sawi.

Chief Minister chuan khawtlangin an mamawh nia an hriat avanga school an din ṭhin chu sawrkarin ṭha a tiin, a zah a, chuvangin din phalna permission te pein, grant-in-Aid ah te a dah a, mahse a aia sanga daha provincialise turin an nawr a, Sawrkarin sum harsatna a tawh hrechang duh lovin khar hial an tumte hi a pawi hle a, sawrkar chuan tihngaihna a hre tawhlo a ni a ti. Sawrkarin sum nei se dil buai ngai lovin an duh ang chu a tihsak daih tawh ang a ti. School khar avang hian zirlai naupang ten an tawrh theih avangin, harsatna tawklo turin Education Ministerin ruahmanna a siam mek a ni a ti.

Chief Minister chuan heng school khawtlang dinte hi ṭha taka an kal chhoh zel theihna turin aided ang ten kalpui a tum a ni a ti a, provincialised erawh a tum tawhlo a ni a ti. School engemawzah Board exama result Nil te chu sawrkar chhawdawlna an hmu zel dawn em tih chu departmentin a ngaihtuah mek a ni tiin, a tiṭha te erawh chu chawisân zel an ni ang a ti. Chief Minister chuan hmasawnna lo kalte hi khawpui tawt tawh taka beng zel loin, Mizoram khua remchanna zelah sem zaia kal chohpui tum a ni a ti.

Khualzahawm Tuikum bialtu MLA Pu K.Lianzuala, Chairman KVI Board chuan sawrkar hi kan nu leh pa a ni teh meuh a, mahse kan dil zawng zawng hi a pe vek thei fo lo a ni a ti a. Hmasawnna kal chho zelah Tlungvel mipuite chu hmathlir thiam tak nei turin a chah a ni.

Tlungvel Higher Secondary School hi kum 2010 May ni 4 khan khawtlangin an din a, bul ṭan nan bialtu MLA chuan cheng nuai 1 ṭanpuina a pe a, tuna a building hi khawtlang thawhkhawm aṭangin ni 25 June 2012 khan sak ṭan a ni a, cheng nuai 12 chuang an seng a ni. Class room building ringawt hi 72ft asei leh 18ft a vâng a ni a, office hi 30ft leh 18ft a zau a ni a, a school hmun zawng zawng zau lam hi 5839 sq.m a ni. Mipa leh hmeichhia zirlai naupangte tan inthiar-na a hrang ve ve-in siam a ni bawk. Thawktu, zirtirtu leh office staff tiamin 8 an awm mek a, kuminah zirlai 46 an awm a, Tlungvel leh a chhevel khua aṭangte-a kal an ni. Board exam result an nei tha thin hle a, passed percentage 86% atanga 100% te an nei ṭhin a ni.

About Editor

C.Lalrochhuanga, New Serchhip, Serchhip - 796181 Mizoram Contact: 8974286711

Comment ( 1 )

  1. Pingback: Sawrkarin School Provicialise A Tum Tawh Lo | CNH

Leave a Reply

Your email address will not be published. Required fields are marked *