Education Minister tharin hmathlir a nei lo:MPCC

Mizoram Pradesh Congress Committee (MPCC) chuan thuchhuah siamin MNF sawrkarin zirna a kalpui dan chu ngun takin a thlir reng tih sawiin, beisei a sang lo hle nia an ngaih thu leh Education Minister thar chu Mizoram zirna siamṭha tura hma thlir (vision & idea) nei miah loah a ngai tih an sawi.

MPCC chuan an thuchhuahah chuan hun engemawchen zing dar 8:30-a school ṭan hma lo kalpui tawh, zirchianna pawh awm hauh lo a February 12, 2019-a Cabinet Meeting-in zing dar 9:00 a a sawn tlai nghal ringawt chu MPCC chuan a pawi a ti a. Hei hi ram tana hmasawn tuma hmalakna lam aiin sawrkar hmasa hnathawh a nih avanga tihdanglam hrim hrim tumna kal zel niah a ngai a tih an sawi a. Congress sawrkarin Mizoram mipuite hnathawh hunchhung tih rei tuma awmze nei taka hma a laknate chu MNF sawrkar chuan a rawn ti chhe leh ta vek a ni; MNF sawrkar thiltih dan rum rum hi khuareiah ramin kan hatpui dawn lo tih a chiang hlea an ngaih thu an sawi.

February 7, 2019 khan Federation of Mizoram Government School Teachers (FMGST) conference-ah School Education Minister chuan Mizoram Public Service Commission (MPSC) kaltlang lo a zirtirtu 1000 vel lak a nih tur thu te, heng zirtirtute hi contract leh muster roll-a lak phawt a, a hnu a dah ngheh leh theih tura tih an tum thute a sawi chu sawrkar hna hmanga party mite induhsak tumna chiang tak a nih avangin MPCC chuan ṭha lo a ti tih an sawi a, a nghet loa zirtirtu lak an nih dawn pawhin MPSC kaltlang ngeiin ni rawh se tih chu an ngaihdan a nih thu an sawi bawk.

MPCC chuan, “Mizoramah chuan sorkar hi hna siamtu lian ber a ni a, thalai lehkhathiam tam ber pawhin sorkar hna thawh chu an innghahna ber a ni thin. Chuvangin, sorkar hna lakna reng reng thianghlim leh fair taka kalpui a ngai a; a nih loh chuan thalai thinrim leh beidawng tam tak a siam thin a ni,” an ti a, Hetiang a nih avang hian Mizorama Congress party kum 10 a sawrkar chhung khan sawrkar hna lakna reng reng dik taka kalpui a ni ṭhin a, sawrkar hna tam zawk lak hna chu MPSC kutah dah a ni zel an ti a, Congress sawrkar chhung khan sawrkar hna lakna reng rengah mipui leh exam beitute atang pawhin sawiselna a awm ngai lo hle a ni, an ti bawk

MPCC chuan Congress sawrkar khan zirna ti hmasawn turin zirtirtu lak belh teuh ringawt aiin zirlai nei mang lo school-te sawikhawm/ tihtawp a, awmze nei a zirtirtu sem rual tumin nasa takin hma a lo la tawh a. MNF sawrkar thara Education Minister-in zirtirtu semrual lam aia party mite in duhsak theihna tura zirtirtu lak belh ringawt a tuipui nghal chu Mizoram zirna siamṭha tura hmathlir a neih loh zia a chiang hlea an ngaih thu an sawi bawk.