Mizoram inthlanpui BJP tana viltu Pu Himanta Biswas Sarma Assam Finance Minister chuan, BJP chuan hmangaihna leh inremna a duh ber a ti.
BJP Mizoram State Office nimina a tlawhnaah thu sawiin Mizoramah BJP te Kristian te tan a hlauhawm niin sawi a awm thin a. Assam-ah BJP Kristian Cabinet Minister pahnih an nei a, Portfolio pawimawh tak tak an chang a ti a. Assam-ah hian Kristian te an tlakchhamna leh harsatnaah vawi tamtak chhawmdawlna pek an ni tawh a ti bawk.
Meghalaya, Manipur, Nagaland, Tripura leh Arunachal-ah MLA tam tak an nei a. Heng State tinah te hian Sakhaw thilah harsatna leh buaina a awm ngai lova, a thleng ngai bawk lo a. Congress sawrkar lai erawh chuan heng hmunah hian harsatna tam tak a thleng chamchi a, sakhaw thil a buaina tam tak, vawiin thleng a Social Media darh thin hi Congress hunlaia thleng leh amah ngei pawh Congress a awm lai a thleng a ni, a ti. Nagaland ah hian Sawrkar intawm an siam avangin BJP in Deputy Chief Minister an nei a, chu pawh Kristian a ni a. Arunachal-ah MLA 12 an neih atangin mi 4 te Kristian MLA te an ni a. Congress sawrkar lai erawh chuan Kristiante tan Minister post pek an ni ngai lo a chuvang chuan Mizoram mipuite pawhin BJP chu Kristiante tan a hlauhawm lova, a hlauhawm ngai bawk hek lovang tih lo hria se a ti.
BJP chuan sakhua zawng zawng a zahin a ngai hlu vek a, Congress chuan Politics khelhna hmanrua atan sakhaw hrang hrang inngeih lovin awm sela, tih an duhthusam a ni a, chu chu remchangah lo hman chu an tum dan leh chin thin dan a ni, a ti.