Kum tina an lo tih ṭhin dan angin kum khat chhunga Police mi leh sa duty laia thite hriatrengna hun “Police Commemoration Day, chu Inrinni khan ramchhungah hman a ni a, Mizoramah pawh Aizawl bakah District Hqrs-ah te hman niin, Commemoration Day Parade neih a ni.
Aizawl-ah chuan he Commemoration Day Parade hi Martar Thlan, 1st Bn.MAP Hqrs., Armed Veng-ah DGP Pu Thianghlima Pachuau hova urhsun taka hman a ni a, “Martar Thlan” ah hian DGP leh Police officer dang ten pangpar an dah nghal bawk.
Serchhip-ah chuan SP Office tualah Addl. SP Pu Lalmuanpuia, MPS hovin zing dar 8-ah hman a ni a, Police 43-in he hun hi an hmang a ni.
Lunglei ah chuan 2nd Bn.MAP hmun Luang-mual-ah Lunglei SP Pu Lalṭhafamkima Jongte hovin urhsun takin an hmang a, Lawngtlai Police te paw’n, Lawngtlai Police Station tual ah, SP, Pu Lalsanglura hovin Inrinni zing dar 8 khan hun an hmang bawk.
Kum 1959 October ni 21 khan China sipai ten Ladakh-a Police Post an lak a Police mi leh sa mi 9 an kah hlum hriatreng nan leh ram tana nunna pe Police-te hriatreng nan he ni hi India Sorkar chuan “Commemoration Day”-ah puangin kumtin ram pumpuiah hman ṭhin a ni a, Commemoration Day Parade hi India ram State Capital-ah leh District capital-ah te neih niin, ram puma Police duty laia thite hming chhiar chhuakin anmah-ni hriatrengna leh sunna urhsun taka hman a ni ṭhin a ni.
New Delhi-ah chuan Police Memorial Groud-ah Union Home Minister Rajnath Singh-a hoin hman a ni a, Pu SIngh-a hian Police martarte hnenah zahna a hlan a ni. Ani bakah hian Minister of State for Human Resource Development Dr Satya Pal Singh pawhin zahna a hlan a. Director, Intelligence Bureau Rajiv Jaina’n kumin chhunga Police thi te hming a chhiar chhuak a. Central Paramilitary Force hotute leh Delhi Police Commissioner-te pawh he hunah hian an tel a. Vawiin inkhawmah hian nikum September leh kumin August inkarah hian Police 383 an thih thu tarlan a ni.