Tunlaiin Serchhip-ah eirawngbawlna gas a harsa hle a, hemi chungchangah hian Pu FC Malsawmtluanga, Manager Mizofed LPG Serchhip chuan Gas harsat chhan leh Gas hnianghnar tura theih-tawpa hma an lak mekna te thuchhuah siamin a sawifiah.
Manager, Mizofed LPG-in sawifiahna a siamah chuan MIZOFED Serchhip hnuaiah hian tun dinhmunah hian consumer 11016 an nei a, heng zinga 7807 te hi active customer an ni a, kumin chhung hian mamawh ang zât supply an dawng lo ṭhin chu an buai nachhan ber a nih thu sawiin, an sem dan phungah thla katah Trip 13 an dawn tlin loh chuan harsatna an tawh ṭhin thu a sawi a, hetihlai hian June thla aṭang khan thla katah trip 7 aia tam dawn tlin a awm tawh lo a ni.
LPG hi MIZOFED Serchhip chuan Mualkhang aṭangin an la a, nikum lam aṭang tawhinTransporter tlan ṭha duh lote avangin harsatna tawh ṭan a ni tih sawiin, sawrkar pawhin IOC nen inremna te siamin Supply Department hnuaiah truck 14 vel inziak lûtin harsatna zualpui chu sutkian a ni tih a sawi a, nimahsela chung truck te chu December a thlen meuh chuan an bâng zo leh deuh vek a, Mualkhang aṭang hian Mizoram chawm tur hian nitin truck 21 vel a ngaih laiin tun dinhmunah truck in-report thei hi 5-8 vel chauh te a ni ṭhin a, heng truck in-report aṭang hian Serchhip tâ tur chauh phurh reng theih a nih bik loh avangin hetiang hian harsatna tawh chhoh a ni ta tih Manager chuan a sawi bawk.
Pu FC Malsawmtluanga chuan Serchhip-a harsatna tawh mekah hian IOC pawhin theihtawpin hma a la reng tih a sawi a, Borkhola Bottling Plant (Silchar) hnuaia truck tlan ṭhenkhat pawh an pawt peng ve bawk a, mahse chuti chung chuan indaih tawk a la awm thei chuang lova, thla hnih thla thum chhung vel dawn ṭhat loh chuan hun rei tak nghawng a nei zui ṭhin a, thla khat dawn ṭhat emaw ringawtin a hliahkhuh zawh leh loh ṭhin avangin harsatna a thleng leh ṭhin tih a sawi.
Hetiang hi gas dinmun a nih avangin Manager chuan Gas supply chungchanga harsatna te hriatthiampui a, Gas hnianghnar tura theihtawpa hma an lak mekna te hriatsak turin Serchhip mipuite a ngen a ni.
