Nimin khan MNF Party bultumin Mizoram hmun hrang hrangah Martar-te Ni hman a ni a, Serchhipah pawh MNF East Block Serchhip chuan Martar-te Ni hi urhsun takin an hmang.
Martar-te Ni-ah hian Martarte hriatrengna lung-phun Serchhip Bazar hmunah Martarte zahna leh chawimawi-na pangpar an dah a nih hnuah Pu K.Tlangthanmawia In, Bazar Vengah hun hmang chhunzawmin, Pu C.Vanlal-siamthara, Vice President, MNF East Block, Serchhip-in kai-hruaiin, khuallian Pu K.Liantlinga, Ex MLA bakah Gen.Hqrs MNF aṭanga lo kal ten thu an sawi a.
Pu K.Liantlinga chuan Politics chu lalna leh thuneihna duh vang te, sum leh pai vangte, nawmsak duhna avangin mi tam tak chuan an khel a Martarte chuan Mizoram leh hnam a lo din chhuah a Zalenna kan neihna turin Politics an khel a, chu chuan Mizo Nationalism hi a keng a ni a ti a, Mizoram a Party hrang hrang te chuan Mizoram leh hnam dinchhuahna leh tun nunna turin ruahmanna ansiam theilo a, Martarten ram leh hnam tana Politics an lo khelh chu MNF chuan vawng nung zela ni a ti a, ram leh hnam tana nunna hlântute chu khawvel ram hrang hrang pawhin a ngaisang a, a chawimawiin a zah a, keini pawhin Party Politics zawnga ngai lova Mizo Nationalism rilru pu a, an nunna an hlan chhan “Ram leh hnam dinchhuahna turin” theihtawp kan chhuah ve a ngai a ni a ti.
Nimina inkhawmah hian Mizoramin zalenna a suala nunna hlantu Martar te sunna hun hman a ni a, Pu T.Zadingliana President MNF Block chuan lawmthu sawiin inkhawm hi a ṭin a ni.
Hemi hmalam nimin zing khan Martar-te Ni pual hian Serchhip Damdawi ina awm, damlote kanin artui an sem a ni.
Martarte Ni vawi 37-na hmanna lian ber Aizawl Luangmuala Martar Thlan-mualah hmannaah pawh MNF hruaitute leh Martar chhung-kuaten thlanah pangpar an dah a, MNF Sr. Vice President Pu Tawnluia’n thu sawiin, kum 1980 aṭang khan Martarte Ni hi hman ṭan a ni a, Martar Thlanah hian mi 1,702 dah an ni tawh, a ti a. Martar-te’n an thisena an lo bual tawh hnam zalenna sualna hi an tawpsan thei lova, an kal zel dawn, a ti.
Lungleiah chuan MNF Gen. Hqrs. President Pu Zoramthanga hoin Mizo Hnam Runah hman a ni a, Pu Zoramthanga chuan Zoram tana martar-te zahna leh chawimawina chibai a bûk tih sawiin, Martar-ten a man an pek hlut zawng hi chhut chhuah theih rual loh khawpa hlu a ni a, an thisena a man an pek sa Zoram tan Zofate’n a man an pek ve a ngai a ni, a ti a, Martar-te hniak hnung zui tura inhlan thar turin mipui a sawm a ni.
Lunglei Sub Hqrs ruahmanin Lunglei veng hrang hrang thlanmuala Martar-te thlanah nimin zing khan zahna pangpar dah a ni bawk a ni.
MNF Vice President Pu R. Tlanghmingthanga hoin Sialsuk-ah he ni hi hman a ni a, Dr. R. Lalthangliana, Vice President hoin Hnahthial MNF Block-I buatsaihin Market Building-ah Martarte Ni hi hman a ni bawk a, Kanghmun-ah chuan MNF Treasurer Pu Vanlalzawma hoin hman a ni.