Lunglei District, Pukpui Village Council seat 5 awmnaa Congress member 3 leh MNF member 2 te Pukpui NGO Joint Meeting ten ni 20.9.2017 ralhmaa VC te bâng tura an phut chu All Mizoram Village Council Association chuan mak an tih thu leh hriatthiam harsa an tih thu an sawi.
All Mizoram Village Council Association chuan India Democracy leh Consitution hmanga mipui thlan leh din Village Council hian Dan bawhchhiatna a neih a, dân hmang veka engkim finfiah a nih chauhin ṭhiah leh bantir theih an ni tih sawiin, Pukpui khawtlang rorelna chhunga inhriatthiam lohna thleng chu pawi an tih thu an sawi a, VCP leh VC member-ten dân bawhchhiatna leh thil diklo, khawtlang leh mipui chanvo khawih chingpenna a awm a nih chuan an chungah FIR thehluh emaw, DLAO, Lunglei hnena Complaint thehluha chhuichian a, thil diklo titu chunga Action lâk ngei hi AMVCA duhdan a ni tih an sawi a, dân hnuaia engkim chhuichian a nih hma chu Pukpui VCP Pu K.Darsiama leh VC member dangte chu an banna chhan tur AMVCA chuan a hrelo a, Pukpui NGO te pawh Dan leh Hrai kawng zawh turin an ngen nghal a ni.