Zothlifim Logo
Loading ...

Sawrkar laipui chuan kum 2017-2018 a central pool atanga MBBS leh BDS zir turah Mizoram quota chu kum dang aiin a titlem a. Hmarchhak state dang quota erawh chu a pung thung.

 

Ministry of Health & Family Welfare chuan Zirtawpni zan khan state hrang hrangten central pool aṭanga MBBS leh BDS an zir theihna tur quota a tichhuak a, Ministry-in state chanpual a tihchhuah tharah hian kum danga Mizoramin MBBS seat 25 a neih ṭhin chu 17-ah tihhniam a ni a, BDS seat 3 pek a ni bawk. Kumin a central-in Mizoram seat a pek zingah hian kum danga a pek ṭhin Medical College ṭhaho pawh a tel lo a ni. Hetihlai hian hmarchhak state dang Meghalaya leh Arunachal Pradesh te erawh kum dang zawng aiin sawrkar laipui hian quota a pe tam a, a lêt deuh thawin a tipung nia thudawn a ni. Mizoram seat tihtlem a nih chhan hi hriat a ni hrih lo.

 

Kum dang aia Mizoram quota tihtlem a nih chungchangah hian Zalen chanchinbu-in Higher & Technical Education Minister Pu R.Romawia chu telephone hmangin a bia a, Seat tipung leh tura sawrkarin beih an tum leh tumloh zawhna chhangin Minister chuan, “Central thu thu a ni a, engmah a la sawi theih loh,” tiin a chhâng a. Higher & Technical Education hotute pawhin central-in Mizoram quota a titlêm chu a chhan an hriat bik loh thu an sawi a, kumin Mizoram qouta-a pakhatnain a thlan Medical college pawh central seat pek zingah a tel loh avangin counselling tihṭhat leh a ngai dawn niin an sawi bawk.

 

Mizoram sawrkar chuan NEC quota-a MBBS zir turin RIMS Imphal-ah mi 7, Assam Medical College, Dibrugarh-ah mi 1 leh NEIGHRIHMS, Shillong-ah mi 3 a tir tawh a, BDS zir turin Regional Dental College, Guwahati-ah mi 3 leh RIMS, Imphal-ah mi 4 an tir tawh bawk a ni.

 

NEC kaltlanga Mizoram sawrkarin Assam Medical College, Dibrugarh a zir tura thlan chu College thuneituten NEC leh Mizoram sawrkar pawh hriattir lovin anmahni thuin a lo titawp a, hei vang hian he college-a zir tura thlan chuan harsatna a tawk a, Higher & Technical Education department chuan a ṭul angin hma an la nghal a, Chief Minister leh H&TE Commissioner pawhin ziakin an bawhzui nghal nia thudawn a ni.

 

Zalen zawhna chhangin H&TE hotute chuan Chakma zirlai 4, tun hnaia counselling neihpuite chuan khawi Medical College-ah mah admission an la ti lo niin an sawi a, “NEC kaltlanga zir turte chauh lehkha pawimawh kan la pechhuak a, central pool aṭanga zir tur tumah lehkha kan la pechhuak lo a ni,” an ti.

(Courtesy:Zalen)