Zothlifim Logo
Loading ...

Serchhip District Volleyball Association (SDVA) buatsaih, SDVA League-2017 chu nimin khan Vengchung Volleyball Court-ah khelh ṭan a ni a, he Volleyball League hi MJA Serchhip District President, Pu C.Lalhminghlua chuan khuallian niin a hawng a ni.

SDVA League-2017 hawnna inkhawm buatsaihah khuallian, Pu C.Lalhminghlua chuan Serchhip District-a infiammi leh infiamna chawikan-na atan MJA Member te chuan tih theih an nei a nih chuan an inhuam reng tih sawiin, thuthar thehdarhtute chu a duh apiang te tan ṭangkai taka hman theih an nih thu a sawi.

Infiamna hian mihring te rual min pawltir tih sawiin, kan ngaihhlut te hi kan nun kaihruaitu an nih ṭhin avangin kan kawng zawh te pawh midangte tana zahawm ni tura kan ngaihhlut thiam a ṭul thu a sawi a. Serchhip District-a mi hrang hrang ten mahni zawn ṭheuh ah kawng zawh kan neih thu sawiin, heng kan kawng zawh ṭheuhah te hian District tihmingṭhatu ni thei tura ṭan kan lak a pawimawh thu a sawi a. Infiamna chu intihhlimna atan leh dinhmun siamna atana hman ṭangkai theih a nih thu pawh sawiin, mahni dinhmun siamṭhatna atana infiamna chu hman ṭangkai tum turin kalkhawmte a chah bawk.

He Volleyball League-ah hian 8 telin, nimin khan heng team tel te hian an match hmasa ber an khel ṭheuh a, vawiin chawhma dar 10 aṭangin Vengchung Volleyball Court-ah khelh ṭan leh a ni dawn a ni.

Nimina inkhel result chu – Chanmari Volleyball Club-in 3-0-in Friends Club, New Serchhip an hneh a, Vengchung VC-in 3-2-in Chhim Veng VC an hneh a, Hlutei Chhiahtlang-in 3-0-in Thenzawl VC an hneh a, Thentlang G&SA-in 3-2 Bungtlang Khawnglung an hneh bawk a ni.

Vawiina inkhel tur te chu – Bungtlang Khawnglung leh Hlutei Chhiahtlang an inkhel hmasa ber ang a, Thentlang G&SA leh Thenzawl VC, Chanmari VC leh Vengchung VC, Friends Club leh Chhim Veng VC te an inkhel ang.