BPL chhungkua te hnenah Tuizem kan sem dawn:CM

Mizoram Chief Minister leh MPCC President ni bawk Pu Lal Thanhawla chuan an sawrkar chhung chuan a mamawhte hnenah NLUP an sem zel an tum thu leh tun maiah pawh BPL chhungkaw te hnenah fur leh ṭhalah pawh tui an ngheih loh nan tuizem pek an tum tih a sawi.

He thu hi nimina Political session Congress Bhavan Golden hall-a an neihah a sawi a, Pu Lal Thanhawla chuan Zo-Carbon thubuai chungchang sawiin, ACB ten ngawrh takin an chhui a, officer engemaw zat dik lo hrem turin hma an la a, FIR te thehlutin chak taka hma an lak laiin Ruatfela nu- in High Court-ah PIL a thehlut a, a ukil-ah pawh Serchhip biala ṭum engemawzât MLA inthlana amah khing tawh ṭhin a ruai tih a sawi a, Pu Hawla te ukilin an PIL thehluh hi Public interest litigation nilovin Political Interest litigation a ni a tihsak a, a dik khawp mai a ti.

Pu Hawla chuan Lottery chungchang sawi nawn lehin “CAG report adik loh zia kan sawi te hi PRISM hian an huatna chhan chu an hmanraw hman ber, min beihna tur atana an neichhun a nih vang a ni” a ti a, CAG report te hi Luka ziak anga diklo theilo a ni lo. NLUP chungchangah base line survey mumal an nei lo tih te hi an report dik lohzia entirna a ni a ti bawk. “Mizoram Exodus Movement pawl lo ding te hian khawi ah nge min Exodus pui an tum? ka hre lo” a ti a, “Mahse heng lo dingte hi kan sawrkar lehna atan a lo ding zawk an ni,” a ti.

Pu Hawla chuan Congress party chu party dang nen an danglamna sawiin, mahni ṭha tih zawng sawi mai mai leh mahni vei zawng zawng sawi mai ṭhin ang hruaitu an nei ve lo tih a sawi a, anni chu an hotute thil engkimah inrawntlang ṭhin, Collective leadership nei an ni tih sawiin, MNF sawrkar chu ramhnuai sawrkar siam ṭhin an ni a, an sawrkar tirah an lung-rual ve hle a, an term hnihnaah Poltics-a an dihmun leh thiltih-theihna te chu sum siamna rem-chang a ni tih an hriat kha an tlukchhiatna a ni a, an minister ten sum an insiamsiak a, anmah-ni leh an party worker rethei leh hna changve lo te inkar a zau zel a, an tluchhe ta a ni, a ti a, chutiang ang chu an party chu an ni ve lo a, “Kan minister te hi hausa thar thut an awm em tih te hi min chik rawh u,” a ti.

He hunah hian Pu T.Sangkunga MLA-in zin report tawi pe-in MPCC Media Department aṭangin Lalhruai-tluanga Kawlni in report a pe bawk a, Pu Lal Thanhawla chuan mithar 34, ṭhalai zirlai hruaitu hlui te leh Pu Tam Lal Lohar (ex Secretary MPSC) te chhungkua mi 5 an zavaiin mi 39 a lawmlut nghal a ni.