Zothlifim Logo
Loading ...

Police chuan thuchhuah siamin, tunlai hian social media kaltlanga Online shopping ti ṭhinte fimkhur turin an chah.
Police chuan an thuchhuahah chuan online shopping tih nana hman ṭhin WhatsApp leh Facebook-a Buy and Sale Group hrang hrang te chu misual ṭhenkhat ten mi bumna atana hmun rengchangah hmang ṭhinin mi bum tur an zawng ṭhin tih an sawi a, heng te avang hian online shopping ti ṭhin te, online a thil an zawrh leiah te fimkhur turin an chah a, mi ṭhenkhat ten an thil lei a to zawk a hralh leh beiseiin Social Media Buy and Sale Group-ah te an zuar leh ṭhin a, misual ṭhenkhat ten an thil rûk leh dân lova an thil neihte awlsam taka tihral nan an hmang ṭhin tih an sawi bawk a, chuvangin mipui te online-a thil man tlâwm ngawr ngawr lei a him lo a ni an sawi.

Police chuan Facebook leh WhatsApp kaltlanga thil chah/lei dawn reng rengin thil man tlâwm uchuak tak a zuar an awm chuan inbumna emaw, mi thil rûk leh police case nei te an ni thei tih sawiin, lei hmaa belchiang hmasa tur leh bzara zawrhna rate nena inthlau lutuk chu zirchiang lova chah/lei ngawt lo turin mipuite an chah a ni.

Hei bakah hian Online-a bungrua zuartu chu pawisa emaw bungrua pek hmain amah hriatchian hmasak tum turin mipui te an chah a, a contact number bakah a personal information/business information hriatchiana chhinchhiah thin tur a ni a, hei hi a hnu-ah thil lei chungchanga buaina (police investigation) neih palh pawhin hriat chhuah an har loh phahin buaina lakah a fihlim phah thei a, Fake account/identity lem hmangin bungrua te (thil ruk/dan lova thil neih te) a zuar ru thei a ni tih an sawi bawk.

Tlawm lutuk tih hrereng chung leh mi thil ruk sa tih hre reng chunga lei phei chu IPC Section 411 hmangin a rutu nen angkhat rengin hrem theih a ni tih an sawi a, Buy and Sale group hrang hrang-ah mobile phone lei/inthleng (swap) ṭhin pawh rukru te tan an mobile ruk tihralna awlsam tak a ni tih an sawi a, Mobile thar leiin sealed pack a ni em tih chian hmasa ṭhin tur leh Secondhand mobile lei dawn pawhin a hralhtu hnenah Cash memo, Phone Box leh Original Charger & accessories dil ṭhin tur a ni an ti a, heng hi an pe thei lo a nih chuan ruk a nih rinhlelh nghal a, lei loh a him ber tih Police chuan an sawi.