Zothlifim Logo
Loading ...

Nimin khan PHE Minister Pu Zodintluanga chuan Internet kaltlanga tui bill pek theihna tur Online Bill Payment chu hman theih a nih tawh thu a tlangzarh a, hei hi Aizawl bik atan a la ni rih.
Minister chuan, “Tun aṭang chuan a duh tan tui bill counter-a kal ngai tawh lovin internet hmangin online bill payment a tih theih ta a, hei hian nasa takin mipui tan awlsamna a thlen ngei ka beisei”, a ti a, mipuiten an tui bill anmahni in aṭanga an pek theih na atana hun engemaw kalta aṭanga theihtawp chhuaha lo buaipuitu  PHE Department mi leh sa te inpekna a fakawm takzet a ni a ti a.  PHED chu a hming tumtu nimahsela mipuiin bill an pek te internet hmanga lo khalhkhawmna tur payment gateway lo buaipuitu Information & Communication Technology Department bakah online payment tih a nih theih nana clearance tih ngai zawng zawng chinfelsaktu Finance Department chungah lawmthu a sawi a, mipui tana awlsam zawkna siamsak tura Department te thawhhona chu a chhuanawm tak zet a ni a ti.

Tui bill pe duhte chuan https://phebilling.mizoram. gov.in -ah lûtin an consumer number ziak lutin an tui bill hi an pe thei tawh ang a. An tui bill pekna chhinchhiahna detail chu an email chhut luhah chuan a lo thawn nghal tawh dawn a ni. Tui bill pek a nih hian net banking hmangtute chuan tui bill Rs.500 chin hnuailamah chuan transaction tinah Rs.5/- service tax an chawi ang a, Rs.500/- aia tamah erawh chuan Rs.7/- service tax an chawi thung ang. Credit card hmangtute chuan transaction khatah an bill pek zat 1% service tax an chawi ang. Debit Card hmangtute chuan tui bill Rs.2000/- chin hnuailamah transaction tinah 0.75% service tax an chawi ang a, Rs.2000/- aia sangah 1% service tax an chawi ang. Mobile wallet hmangtute chuan transaction tinah Rs.5/- service tax an chawi bawk ang.