Inrinni zing dar 7 aṭang khan Serchhip khawpuia Food & Civil Supply Retailer hrang hrang aṭangin Ration Card thar pek chhuah ṭan a ni ta a, he Ration Card hi pakhat `10 zela khul chhuah tur a ni.
Food Security dawng turte tana Ration Card sem mek hi AAY tan Ration Card rawng eng (Yellow), Priority Household tan rawng hring (Green) leh NFSA hnuaia hamṭhatna dawng ve lo turte tan Ration Card vâr (White) siam niin, karleh aṭangin Ration Buhfai man tlâwm zawk leh man zawka lei theih ṭan nghal a nih tur thu kan dawng bawk.
Sawrkar laipui ruahmanna thar angin mirethei leh harsa zawkten buhfai man tlâwm zawka an lei theihna tur National Food Security Act tharah hian Priority Household Ration Card (Green) tan hian thla khatah Buhfai Kg. 32 lak ṭhin a ni tawh ang a, Kg khat hi `3/- a lei a ni tawh dawn a ni.
Serchhip DCSO hnuaiah hian he Food Security Act hmang tur hi khawpuiah Beneficiaries 15,514 (48.6%) leh thingtlangah Beneficiaries – 36,821 (81.88%) an awm a, District dangte rualin he Food Security Act 2003 hi an hmang ṭan ve nghal a ni.
National Food Security Act ,2013 hnuaia Central Sawrkar in Mizoram hnena thla tin a buhfai man tlawma pek theih zat quintals 6.60,000 ani a,buhfai phurhna man tur atan quintal khatah `75/- zel central-in an tum dawn bakah Retailer Margin atan Quintal khatah `143/- an tum dawn bawk a ni.
Sawrkar laipui ruahmanna thar angin mirethei leh harsa zawkten buhfai man tlâwm zawka an lei theihna tur National Food Security Act hman tan a lo ni chho dawn ta chu mipuite an lawm hle a ni.