Zirtawpni kalta khan AH & Vety Department Minister, Pu C.Ngunlianchunga chuan kum khata vawk note 4000 thar chhuah theihna tura ruahman, ‘Pig Multiplication Farm’ Thingsulthiah, Tlangnuam-a mi chu a hawng a, Farm enkawl dan tur kaihhruaina lehkhabu a tlangzarh bawk.
Minister chuan, Mizote’n Vawk sa kan ngainat ang hu hian kan intodelh lo hle a, phai lam aṭang leh Myanmar lam aṭangin vawk note leh vawk talh tur nasa taka lâkluh a ngai a, a thlâwnin state pâwn lamah sum tam tak a luangral reng chu uihawm a tih thu sawiin, heng sum luang chhuak vênna leh tireh tur hian NLUP sum leh RKVY hmangin hmalâk a ni a, vawk sa, vawk talh tur leh vawk note pawh reilote-ah kan intodelh thuai beisei a ni, a ti a, vawk talh tur leh vawk note-a kan intodelh chuan ram pâwn lama kan sum luangral te kan hum thei dawn a, hei hian kan economy-ah nasa takin rah ṭha a chhuah dawn a ni, a ti.
Minister chuan, he farm hlawhtlin nan hian a thawktute an pawimawh rualin uluk taka enkawl a ngaih avangin tual-chhung mite pawhin nasa taka he farm hlawhtlinna turah hian mawhphurhna an nei, a ti a, thawhrimna tel lo chuan he farm hi a hlawhchham ang, a ti bawk.
Pu Ngunlianchunga chuan, Tanhril-ah Ar note tihpunna leh ran chaw siamna hlawhtling taka bun a ni a, Tanhrilah tho hian cheng nuai 400 sengin ranchaw siamna changkang leh rintlak tak bun belh mek a nih thu leh Lawngtlai-ah Social Welfare ṭanpuina in Ar note tihpunna hmun siam a nih thu a sawi bawk.
He multiplication Farm hi RKVY sum (2013-2014 ACA) cheng nuai 475 hmanga din a ni a, kum 2014 khan sak ṭan a ni a, Power & Electricity department-in a hranpain he farm chawmtu tur bik (transformer) 65KVA leh tui lâkna tur 30KVA power an dah sak bawk.
Vawk pui 200 vulhna tur in 4 a awm a, hengah hian vawkpui tur vulhna, vawkpui rai lai, no nei tawh dahna, vawk dam lo enkawlna tur hmun, vawk note dahna bakah a chi thlahtu tur vawkpa vulhna tur bik te a hranin fel taka siam a ni. Kumin chhung ngeia vawkpui 200 dah hman tura ruahman a ni a, he farm aṭang hian kum tin vawk note 4000 thar chhuah theih tura ruahman a ni.
Vawk in sak dan hi Cage system ni lovin group housing (pen) a ni a, a chhuat phah atan Cast Iron hman a ni a. vawk êk leh zun fel fai taka then theih bakah vawk pawh awlsam taka silfai theih a ni ang. Vawk zun leh êk te hi mumal taka paih a, enkawl zui a nih theih nan Drainage system ṭha tak siam a nih bakah vawk êk aṭangin Bio-gas siam tura ruahman a ni bawk.
He farm hi ama sum thawh chhuah hmanga inenkawl tura duan a ni a, Monitoring committee din a ni a, anni hian a ṭul angin ‘Farm Management Board’ hnenah ruahmanna leh inenkawl dan tur mawhphurh-na hi an la dawn a ni.
He farm hawnna inkhawm hi Pu K.Lalnghinglova, IAS, Commissioner & Secretary, AH & Vety department chuan a kaihruai a, Dr. Saingura Sailo, Director, AH &Vety chuan he farm hlawhtling taka a awm theih nana hmalak dan report a pe bawk.