Bairabi bul Zophai-a Pu VL Hminga ram chhunga Assam retailer-in dawr a sak chu Kolasib Bawrhsap Pu H. Lalengmawia thupekin Zirtawpni khan ṭhiah a ni.
Sawrkar thuchhuahin a sawi danin he dawr hi Pu VL Hminga ram enkawltu Pu Zairemsiama phalna in Assam retailer Said Ali chuan a sa a, Ningani khan Kolasib SDC pahnih Pu Lalhmingliana leh Pu Lalngaihawma ten a hmuna thil awmdan an en hnuin, an hriattir angin a satute hian he in hi an ṭhiat leh ta a ni. Bawrhsap chuan he thil thleng avang hian helai hmunah boruak duhawm lo leh muanawm lo engmah a thleng lova, uluk takin district thuneitute leh Police ten an enzui reng a ni, a ti.
Tunhnai thla 3 kalta vel khan Pu Zairemsiama’n phalna a pek hnu-ah Assam retailer Said Ali hian dawrte atan sa a. Mahse helai ram hi Assam leh Mizoramin ramri buaia ngaih a nih avanga a tu state mahin engmah kutthlak loh tura inremna awm mek a nih avanga hetianga dawr tur atana in sak hi inremna bawhchhiatnaah ngaiin he in hi thiah a nih thu a Barwhsap chuan sawi a. Nakin zelah harsatna a punlun loh nan leh ramri depa boruak muanawm lo a thlen loh nan, he in hi thiah a ni a. He in hi thiah a nih loh chuan Assam lamin an ram chinah an ngaihbel thei dawn avangin thiah tir leh a ni.