Special Olympics World Summer Games Los Angeles, USA-a July ni 23 atanga August ni 3 thlenga neih turah Mizo naupang mi 6 leh coach 1 India aiawhin an kal dawn.
Hemi chungchangah hian nimin khan Special Olympics Bharat (Mizoram Chapter) te chuan Aizawl Press Club-ah thuthar lakhawmtute kawmin, Pu Zoliana Royte chuan, India ram aiawha foreign ramah mizo infiammi kal an la tam loh thu sawiin, hetih laia Special Olympics World Summer Games neih tura mizo naupang 6 zet an kal tur chu mizoram tana thil lawmawm tak a nih thu a sawi.
Pu Zoliana chuan, Special Olympics chu rilru lama rualban-lote tan bik a sports federation a nih thu sawiin, khawvel pum huap a hman thin niin India tel in ram 180 chuang an tel tawh a ni a ti a.Special Olympics international chu chu International Olympic Association recognize thlap a ni thu sawiin, Special Olympics World Summer chu kum hnih danah neih thin a nih thu a sawi.
Special Olympics World Summer Games Los Angeles, USA-a neih tura India aiawh tura Mizo naupang tel turte chu Alfred Lalchhanhima, Lal-mawizuala, Thangkhingliana, Lalfakzuala, Lalthansanga Fanai leh Zohlupuii te an ni. Heng Mizo naupang rualbanlo infiammi te hi thenkhat chu Football team-a tel tur an nih laiin thenkhat chu Athetics a tel tur te anni bawk.